لهجة اهل نجد >>>>> لا يفوتك ذا الموضوع

مراحب للجميع


هذا بعض المفردات اللي يحكون فيها اهل نجد اللي هم حنا ....


تسذا
.. المعنى واضح يعني كذا ولازم تقولها وانت ماد براطمك لتحت

فيذا ..يعني فيذا . هنا . " حط العشا فيذا " يعني هنا

مير
..هذي مالها معنا بس اذا سمعته احد قالها اعرف انه من اهل الرياض الاصليين

غديه او غديها .. يعني كوده او كودها ... (( يعني بيفهمون الثانيه ))
مثل ما يقول الابو لولده التسبر " رح ادرس كود اخوانك يغارون منك ويذاكرون " او رح ادرس غديك تنجح باتسر وتطلع دختور ...

صزز
.. يعني صدق والا صززيه يعني صدقي



زلابه .. يعني بطه مالها معنى ثاني

دبووووج .. هذي شينه يعين اذا واحد قالها لك تراه يسبك اقرب شئ له كمخه

دلخ ..انظر اعلاه

ء ء .
.وتطلع من الحلق مثل اذا جيتا لبزر وقلت له عطني الكوره بيقول لك " ءء " وبيرفع خشته فوووووق وهو يقولها ...معناها منيب او لا

هزع .
. يعني طمن او انزل شوي ,,, اللي تبي

منهو ..
افصلها لكلمتين وتعرف معناها


مهوب او مهيب.
.بالعربي ( ليس ) مثل " هذا التفتر مهوب لتس يانوير هذا التفتر لاختس دليّل "

هقوتي .
. يعني ( اظن ) مثل " هقوتي انه فيذا

توحي ..معناها تسمع ,,, اذا جيته تسلم على شايبن من شيابكم تهزع على راسه وتقوله مساك الله بالخير بيقول لك وشوووو ,, بتقول له انت توحي (( في وسط اذنه عشان يسمعك ) وبيقول لك من انت ولده ... الخ "


كتر .
.ويقول الوا! حد لاخوه وهم يتغدون من صحن واحد " لا تاكل من كتري يعني لا تاكل من نفس المكان اللي اكل منه "

جغمه .
. يعني جغمه !! مثال : صديقك راح الدكان وشرا ببسي واحد وقعد يشربه لحاله وانت عيونك شوي وتناتق تقوله ياااخي عطني جغمه ( اعتقد فهمتوها )

بصرك ..يعني بكيفك .... تقول لواحد تعال معنا ... ويقول لك لا منيب جاي ,, ترد عليه "بصرك

بعدي .
. يعني مثلا يقول الابو لولده ,,, بعدي ابوي . بس مدري وشلون تنشرح المهم معناه زين مهوب شين

امصع ..يعني اسحب بقووووووه مثل الام اذا قالت لولدها تراني بمصع اذنك لو ما درست

امحق
..هذي والله نشبه ما ادري وشلون اشرحها لكن ابحاول اعطيكم مثل اللي بيفهم زين واللي مهوب فاهم احسن يعني حبكت الا يفهم هذي .
المثل
: الابو يقول لولده ترااا باتسر ابيك توديني لزواج قصرانا يرد والد ويقول والله اسمحلي انا مواعد ربعي في الاستراحه عاد الابو يقول امحق من ولد عاد يرد الولد اقول خلاص نيتل

يدربي ..يعني يدحرج .. مثل المسترخي يدربي راسه


كنادر .
. تكرمون جزمه

زبيريه
..نوع من النعال تكرمون وهو احسن مبيد للصوارير والضواطير ! والحشرات الزاحفه الاخرى

سرسري .
.يعني سربوت سربوت ........ يعني داشر داشر ,,,,,,, يعني صايع في الشوارع وهو اسهل واحد يطيح في التتن تتن ......... دخان

برندا .
.ميراندا,, لان اول واحد قالها في الرياض كان مزكم وقال براندا

محلي
..مصدي

يا خزياه
..اكثر من يقولها العجز الله يخليهم لنا ولا يحرمنا من حتسيهم يعني انها استحت


سواني .
. رح للجنادريه وانت تعرف وشي ,, ترا مهيب السوق


سماط .
.ماله داعي تروح للجنادريه , رح لاقرب محل مواعين وقل عطني سماط ,,,,, مفرش ناكل عليه ومنول نسميه سفره


ملاس ..ملعقه كبيره مخفسه ننتسب بها الغدا

مراصيع
.. قطرت سعبواتي ، اسالو الحريم ويعلمونكم عنه تراها تنوكل

صبيب ..انظر اعلاه ,,, هو نفسه بس بطريقه ثانيه

ترم ترم..فلم كرتون نسميه منول ترم ترم وبعض البزران يسميه ابو تتنه (! ( اللهم لك الحمد ))
وغيرهم يسميه ابو ذنب (( ياربي لك الحمد ))
وعيال النعمه يسمونه النمر الوردي وهو اصلا بنك بانثر

قاف ..منطقه غير معروفه احتارو فيها اكبر علماء الجغرافيا والتاريخ والفلك والاثار في تحديد مكانها ودايمن تقول الام لولدها اذا ازعجاها " رح في قاف "

عوافي الله .
. هذي الكلمه عقدت كل البزران دايمن تستخدمها الامهات لتخويف البزران اذا بغو يطلعون للشارع بالليل وتقول ترا بتجيك عوافي الله


" مير "

اختلف المترجمون في تفسير هذه الكلمة ، واتفقوا أن هذا المصطلح مال أمه داعي ، ولا له موقع من الاعراب ،
يوضع لتزيين الجملة ،، مثال : الله مير يسلمك ، الله مير ياخذك

" أغديه "

وتعني : كوده !! ،، وفسر الماء بعد الجهد بالماء

" ومصع "

دعوة عند القصمان وتأتي بعدة أوزان : مصع ، يمصع ، ممصوعا ،،
مثال مصعك الشر قولي امين

" ياهملالي "
منتشرة عند النحوتين والنظولين
مثال : مزنة : مادريتي نورة توظفت ؟ ،، حصة : ياهملالي عنده واسطة<<< منقهررررة

" واخـــــــــــــزياه "

مع وضع الاصبع تحت العين ومطهاااا الى ان تصل للفم
مصطلح ينتشر عند بعض الناس يقالهم مستحين ، وهم وجيه بن فهرة ، " ووجه بن فهرة هو الوجه المغسول بمرق

" أويق "

هذه الكلمة تنتشر عند الملاقيف ، معناها أناظر وأناظر معناها أشوف !! ولها نطق اخر هكذا اويدزز
مثال : حصه : خير وش عندتس رازتن خشتس عند الدريشة " النافذة " ؟؟ ،، مزنة : أبد ، أويدز على اللي يفحطون

" أعبطه "

أعجنه واسويبه فطاير

" قوه "

كلمة من أصل إنقليزي " والله محنب سهلين "
معناها تخاويني؟ ، مثال : حصة : قوه معي للسوق ،، مزنة : مشينا ، كلش إلا السوق ، تخاويها وهي مغمضه

" حوّل "

وراكم طيرتوا عيونكم ، ترى منيب بالنجدة ، بس حوّل يعني : انزل

" شنق "

لحووووول ترى عندنا كلمات كذا تدل على الاجرام بس هذي غير اللي تعرفون هذي تعني : جهة

" هماه "

وتجي بمعنى " مب كذا - مو "

" نيم "

وتعني : نائم

" تهقى "

تعني : تظن؟ ، والاسم منها " هقوتي " اي أغلب ظني
مثال : حصة : تهقين نورة تجي ؟ والله ما اهقى انها تجي وراها هالكشة تستشورها

" بوه "
أهم مصطلح عند القصمان ويوضع بآخر الكلمة مثال : وشبوه ، جبتوه ، مادريتبوه ، وينهوبوه، وتقول هالكلمة وانت ماط بوزك شوي




-----------------------------------------------------------------------

والله أني أهقى أن محد بيرد في ذا أبيكم تردون تسذا (( يسلمو على المووووضووووع ))


ملطــــــــــــــــــــوش

الصراحة كلمات اول مرة اسمعها

ههههههههههههههههههههههههههههههههههههههه

مبعد شفتي شئ

لو عشتي في السعوديه شهر واحد كان سألت نفسك :

هاذي اللغه العربيه ؟؟

الأشياء إلي نقولها بالعاده هي "
مير >> هاذي لا يخلو بيت منها حتى طلعت لها نكت

زلابه >> تقال للأولاد دائما

منهو>> اخت مير

كتر>> تقال في الأكل يوميا

بعدي>> ماما دائما تقولها لي الله لا يحرمني منها

كنادر<< الله يكرمكم << هاذي بعض الناس يقولونها عائلتنا ما تقولها

واخـــــــــــــزياه >> عرق السعوديه

هماه>> الحدث الاهم

....................................،،،،،،،،،،،،،،،،،،،،،.........................،،،،،،،،،،،،،،،،،،،......................،،،،،،،،